Тсс.. Чуумпуруҥ эрэ,доҕоттоор! Ойбон диэки атах тыаһыырга дылы дуу, кимнээх эрэ ботугураһар курдуктар дуу?! Ама сүллүкүүттэрбит ойбонноруттан таҕыстылар дуу? Биитэр сылгыһыт Уйбаан сылгылара киһилии кэпсэтэн бардылар дуу?! Бэйи,чуумпуруохха,истиэххэ..
Тохсунньу томороон тымныыларыгар,Айгыр Силик Айылҕабыт иһийэн турар кэмнэригэр аптаах-алыптаах эйгэ аһыллар,таайтарыылаах Таҥха кэмэ кэлэр..
Таҥха – Күрүө Дьөһөгөй Айыы сэттэ ини-биилэриттэн биирдэстэрэ. Таҥха ааспыты аттаран, былыргыны ырытан, билиҥҥи олоҕу кытта тэҥнии тутан, кэнэҕэски кэлэр кэмнэри кэскиллээн көрөр улаҕалаах өйдөөх таҥара буолара биллэр.. Бу Таҥха кэмигэр, дьон-сэргэ инники олохторун сэрэнэн сэрэбиэйдэнэ,өтө көрө сатыыллара туспа ураты кистэлэҥнээх,аптаах үгэс быһыытынан биллэр.. Сыл ахсын тохсунньу 7-19 күннэригэр Таҥха иһиллээһин кэмнэрэ саҕаланар. Ол курдук, Өспөх нэһилиэгэр, бүгүн,Тохсунньу 17 күнүгэр олохтоох библиотекаҕа Таайтарыылаах Таҥха киэһэтэ буолан ааста .Кыттааччылар сэрэбиэйдээһин араас ньыматыгар холоннулар таҥха иһиллээһинин сиэрин туомун кытта билистилэр.Бу курдук интириэһинэй тэрээһин өссө да буолара буоллар диэн бэлиэтээтилэр.