- Информация о материале
- Автор: Super User
- Информация о материале
- Автор: Super User
Кыайыы күнэ — биһиги историябыт саамай дьоллоох, ол эрэн ыар өйдөбүллээх күнэ. Бу күн сэриигэ өлбүт буойуннарбытын ахтарбыт, тыылга үлэлээбит, сэриини тулуйбут дьоммутунан киэн туттарбыт күүһүрэр. Өспөх библиотеката бу күн улуу суолтатын нэһилиэк дьонугар-сэргэтигэр тиэрдэргэ дьулуста.
«Кыайыы туһугар барыта!» — Ааҕааччыга тиэрдиллибит история кэрэһиттэрэ
Библиотека сүрүн тэрээһиннэринэн буойуннарбытын, тыыл дьонун хорсун быһыытын үйэтитэр кинигэ быыстапката буолла. Үс сүрүн хайысханан араарыллан тэриллибит быыстапкаҕа кинигэлэр, докумуоннар уонна хаартыскалар көрдөрүлүннүлэр:
1) «Якутия: все для победы»
2) «Буойун суруйааччылар»
3) «Якутяне – Герои Советского Союза»
Бу күн Кыайыы күнүн бэлиэтиир бырааһынньыктааҕы концерт буолла, патриотическай ырыалары толорон, дьон сүргэтин көтөхтүлэр.Итиэннэ Иннокентий Артамонов "Кыайыы салюта" хоһоону күргүөмүнэн ааҕыы тэрилиннэ. Хоһоон куонкураһа буолла, кыайыылаахтарынан алын кылаастарга Айдар Дьячковский, орто сүһүөхтэргэ сайаана Горохова. Кыттааччылар бэйэлэрин айбыт хоһоонноро сэрии ыар кэмин, Кыайыы улуутун өссө төгүл кэрэһилээтилэр."Айар" кинигэ киинэ таһаарбыт биллэрэр-көрдөрөр историческай лотуота Өспөх библиотекатыгар бастакытын оонньонно, тэрээһиҥҥэ кэлбит кыттааччылар элбэҕи билэн-көрен сэҥээрэн тарҕастылар. Бу тэрээһиннэр Кыайыы күнүн сүрүн суолтатын дьоҥҥо-сэргэҕэ өссө дириҥник тиэртилэр. Ол курдук, маннык тэрээһиннэр кэлэр көлүөнэҕэ дойдуга тапталы, патриотизмы иитиигэ улахан суолталаахтар. Улуу Кыайыыбыт аата-суола хаһан да умнуллубатын!
- Информация о материале
- Автор: Super User
Нэһилиэкпит интеллектуальнай олоҕор саҥа тыынныы килэрбит, сыл устата тыҥааһыннаахтык ыытыллыбыт "Кубок знатоков наслега" интеллектуальнай оонньуубут түмүгэ "ИТОГИ ГОДА 2025" тэрээһиҥҥэ буолла. Бу күрэх — биһиги нэһилиэкпит бастакы идэлээх библиотекара Мария Илларионовна Белолюбская сырдык аатын үйэтитэр уонна төрүт историябытын, култуурабытын сырдатар сүдү суолталаах тэрээһин буолла.
Сыл устата 6 хорсун хамаанда бииртэн биир интэриэһинэй 6 түһүмэх устата өйүнэн-санаатынан хапсыстылар. Билии муоратыгар харса суох устубут знатоктарбыт түмүктэрэ маннык буолла:
🏆 1 МИЭСТЭ — «ПОБЕДА» хамаанда (770 очукуо). Кырдьык да кыайыыга дьулуурдаахтарын дакаастаан, оонньуу муҥутуур кыайыылааҕа буоллулар. Кинилэргэ 20 000 солкуобай уу харчынан бириис уонна нэһилиэк бастыҥнарын Кубога туттарылынна!
🥈 2 МИЭСТЭ — «ӨРКӨН ӨЙ» хамаанда (650 очукуо). Сытыы өйдөрүнэн, дириҥ билиилэринэн чаҕылыйан иккис бочуоттаах миэстэҕэ таҕыстылар. Кинилэр 12 000 солкуобайуу харчынан бирииһинэн наҕараадаланнылар.
🥉 3 МИЭСТЭ — «ВЕЧНЫЕ ПИОНЕРЫ» хамаанда (640 очукуо). Эрэллээх оонньууну көрдөрөн, үһүс миэстэни ыллылар. Кинилэргэ 8 000 солкуобай уу харчынан бириис туттарылынна.
4) «ПАТРИОТЫ» — 630 очукуо;
5) «САМИ» — 610 очукуо;
6) «ЧЕРТОВА ДЮЖИНА» — 400 очукуо.
МАХТАЛ — ҮТҮӨ САНААЛААХ ӨЙӨӨЧЧҮЛЭРБИТИГЭР!
Бу курдук улахан таһымнаах тэрээһин үтүө дьон көмөтө суох табыллыа суоҕа этэ. Өспөххө бастакы идэлээх библиотекарь Мария Илларионовна Местникова (Белолюбская) өр сылларга Өспөх оскуолатыгар директорынан үлэлээбит Петр Гаврильевич Местников оҕолоругар уонна сиэннэригэр барҕа махталбытын тиэрдэбит! Эһиги улахан кылааккыт — кыайыылаах хамаандаларга анаммыт 40 000 солкуобай уу харчынан бириис — кыттааччыларбытын көҕүлээтэ, билиигэ дьулуурдарын уоттаата.
Ону тэҥэ, оонньуубут сүрүн бэлиэтин — көһө сылдьар Кубогы оҥорон таһаарбыт, өрүү биһигини өйүүр КСК «САЙДАМ» тэрилтэҕэ улахан махтал!
КЫТТААЧЧЫЛАРГА УРУЙ-АЙХАЛ!
Хас биирдии кыттыбыт хамаандаҕа, бириэмэтин харыстаабакка бэлэмнэммит, дойдубут историятын хасыһан үөрэппит хас биирдии киһиэхэ махталым муҥура суох. Эһиги көхтөөх кыттыыгыт — нэһилиэкпит кэскилэ тыыннааҕын, билиилээх дьон элбэҕин көрдөрдө.
2026 СЫЛЛААҔЫ ООННЬУУГА ЫҤЫРАБЫТ!
Билиигэ дьулуур манан тохтообот! Эһигини барыгытын кэлэр 2026 сылга буолар саҥа интеллектуальнай сезонҥа ыҥырабыт! Бэйэҕит хамаандаҕытын хомуйуҥ, билиигитин сытыылааҥ — Кубок знатоков наслега эһигини күүтэр!
Билии — күүс, сомоҕолоһуу — кыайыы!
- Информация о материале
- Автор: Super User
Саха Өрөспүүбүлүкэтин Ил Дархана 2023 сыллаахха сэтинньи сэттэ күнүгэр, Саха Национальнай Култууратын Күнүн ахсынньы бастакы баскыһыанньатыгар бэлиэтиир туһунан Укаас таһааран, Саха норуотун духуобунаһыгар, төрүт үгэстэригэр улахан болҕомтотун биллэрдэ. Бу дьоһуннаах быһаарыы биһиги култуурабыт чөлүнэн хаалыытыгар, кэлэр көлүөнэлэргэ тиэрдиигэ суолталаах олук буолла.
Бу үтүө күн чэрчитинэн, Өспөх сельскай библиотекатыгар, Саха норуотун баай култууратын кэрэһилиир кинигэ быыстапката турда. Быыстапкаҕа олоҥхо, номохтор, өс хоһооннорот уонна Саха сирин дьонун олохторун- дьаһахтарын , төрүт үгэстэрин туһунан кинигэлэр турдулар.
Ону таһынан, ахсынньы алта күнүгэр, дьону-сэргэни мунньан, "Төрөөбүт култуурабыт тула кэпсэтии" диэн тэрээһин буолла. Бу кэпсэтиигэ Саха норуотун олоххо көрүүтэ, төрүт үгэстэрбит, сиэрбит-туоммут, былыргы оонньууларбыт суолтата дириҥник ырытылынна. Дьон-сэргэ төрөөбүт тылбыт уонна култуурабыт кэлэр кэскилин туһунан санааларын үллэһиннилэр. Кэпсэтии кэмигэр, өйү-санааны сайыннарар, сытыы туттууну ирдэһэр хабылык, хаамыска, тырыыҥка диэн былыргы остуол оонньууларын оонньоон, дьон үөрэн-көтөн, оонньуу алыптаах эйгэтигэр умсугуйан сэргэхсийэн тарҕастылар.
Маннык тэрээһиннэр төрөөбүт тылбытын, култуурабытын таптыырга, ытыктыырга уонна өссө дириҥник үөрэтэргэ улаханнык көмөлөһөллөр. Саха Национальнай Култууратын Күнэ – биһиги барыбыт өйбүтүн-санаабытын сомоҕолоон, төрүт ситимнэрбитин күүһүрдэр ытык бырааһынньык буолуоҕа.
Подкатегории
Страница 1 из 21
